Алматыда 17 жылға жуық бірге тұрған күйеуін пышақтап өлтірді деп айыпталған әйел сот шешімімен ақталды. Бұған дейін осы іс бойынша сот үкімі шыққаны хабарланған болатын. Тілшіміз екі тараптың өкілдерімен сөйлесіп, олардың оқиғаға қатысты пікірін білді.
Ақталған әйелдің туған әпкелері айтуынша, сіңлісі күйеуімен танысқанына он күндей уақыт өткенде ауылдан алып қашу арқылы тұрмысқа шыққан. Олардың сөзінше, шаңырақ көтергеннен кейін көп ұзамай отбасындағы жағдай қиындай бастаған.
«Келін болып түскеніне бір жыл болмай жатып, күйеуі қол көтере бастаған. Енесі де сіңлімізді қабылдамаған. Осы жылдар бойы олардың қарым-қатынасына араласып отырған», – дейді Жұпар есімді әпкесі.
Туыстарының мәлімдеуінше, марқұм әйелін қатты қызғанған. Олардың сөзінше, оның киіміне де шектеу қойып, әтір қолдануына рұқсат бермеген және хиджаб киюін талап еткен.
Ал марқұмның жақындары соттың ақтау үкіміне қарсы. Олар адам өліміне байланысты жауапкершілік болуы керек деп санайды. Осыған орай марқұмның туыстары сот шешіміне апелляциялық шағым түсіруге ниетті.
