Тас жолда көлік соқтығысы 100-ге жуықтады, деп хабарлайды Kaztoday.kz.
«ҚазАвтоЖолдың» мәліметінше, қолайсыз ауа райы салдарынан 95 көлік соқтығысқан. Оқиға «Астана-Петропавл» тас жолында болып отыр.
Бүгін таңғы сағат 07:20-да аталған автожол учаскесінде (18-232 км) ауа райының нашарлауына байланысты автокөліктің барлық түрі үшін қозғалыс шектелген. Түске қарай сағат 12:30-да ауа-райы жақсарып, жол тазаланды. Десе де көлік қозғалысын «ҚазАвтоЖол» мен полиция департаменті қызметкерлері Щучинск қаласына қарай сүйемелдеген.
«Алайда, алдын ала мәліметтер бойынша, жүргізушілердің жылдамдық режимін және қауіпсіз қашықтықты сақтамауына байланысты тас жолдың 153-ші шақырымында сағат 13:28-де Жаңаталап ауылының ауданында шамамен 95 автомобиль жаппай соқтығысты», — деп мәлімдеді ведомстводағылар.
Қазіргі уақытта оқиға орнына 22 жол көлігі мен трактор жұмылдырылып, бір жолақ тазартылды.
