Қайтыс болған донор 4 адамның өмірін сақтап қалды, деп хабарлайды Kaztoday.kz.
Солтүстік Қазақстан облысында ерекше қайырымдылық оқиғасы орын алды. Облыстық денсаулық сақтау басқармасының мәліметінше, 62 жастағы ер адам ауруханаға кома жағдайында түскен. Өкінішке қарай, дәрігерлер оның миының өлгенін растап, жағдайдың қиын екенін хабарлаған.
Марқұмның туыстары оның органдарын донорлыққа беру туралы шешім қабылдады. Осылайша, медицина мамандары ер адамның органдарын трансплантациялауға дайындап, шұғыл түрде Астана қаласындағы арнайы клиникаға жеткізді.
Нәтижесінде төрт адамға өмір сүруге жаңа мүмкіндік берілді.
Мамандардың айтуынша, мұндай әрекеттер трансплантология саласының дамуына және көптеген пациенттердің өмірін сақтап қалуға үлкен үлес қосады. Қазақстанда донорлық мәселесі өзекті болып отыр, себебі ағза трансплантациясын қажет ететіндер саны жыл сайын артып келеді.
