Әлеуметтік желі арқылы қажылық сапарын ұйымдастырамыз деген уәдеге сенген ондаған азамат ірі көлемдегі алаяқтықтың құрбаны болды. Сот үкімімен екі адам кінәлі деп танылып, бас бостандығынан айырылды.
Тергеу материалдарына сәйкес, күдіктілер Мекке мен Мәдина қалаларына қажылық сапарын ұйымдастыру қызметін жарнамалап, тұрғындардан алдын ала төлем қабылдаған. Олардың ұсынысына сенген 37 азамат жалпы сомасы 60 миллион теңге қаражат тапсырған.
Алайда ұйымдастырушылар өз міндеттемелерін орындамаған. Қажылық сапары ұйымдастырылмай, жәбірленушілердің ақшасы жеке мақсаттарына жұмсалғаны анықталды.
Сот шешімімен екі сотталушының әрқайсысы 4 жыл мерзімге бас бостандығынан айырылды. Сонымен қатар жәбірленушілердің материалдық шығынды өндіру туралы талап-арыздары толық көлемде қанағаттандырылды.
