Конго Демократиялық Республикасында Эбола вирусының таралуы әлі де алаңдатарлық деңгейде. Соңғы тәулікте 101 адамнан індет анықталып, вирус жұқтырғандардың жалпы саны 4945-ке жетті.
Ресми дерекке сәйкес, эпидемия басталғалы бері 2325 адам қайтыс болған. Бұл көрсеткіш 2018–2020 жылдардағы Эбола індетінен көз жұмғандар санынан (2299 адам) асып түсті.
Билік мәліметінше, маусым айының басында расталған науқастар арасындағы өлім деңгейі шамамен 20 пайыз болса, қазіргі таңда ол 46 пайызға дейін көтерілген. Демек, вирус жұқтырғандардың тең жартысына жуығы өмірден озып жатыр.
Мамандардың айтуынша, өлім-жітімнің артуы вирустың күшейгенін білдірмейді. Негізгі себеп — науқастарды кеш анықтау, эпидемиологиялық бақылаудың әлсіздігі және медициналық көмекке уақытылы қол жеткізудің қиындығы.
«Шекарасыз дәрігерлер» ұйымының Конгодағы қоғамдық денсаулық сақтау маманы көптеген жағдайларда Эбола дерті науқас ауыр халге түскен кезде немесе тіпті қайтыс болғаннан кейін ғана расталатынын атап өтті.
