Министрдің айтуынша, БАҚ өкілдері кәсіби қызметін еркін атқаруға, сондай-ақ фото және бейнетүсірілім жасауға заңмен кепілдік берілген құқыққа ие. Алайда адамның келісімінсіз түсірілім тек қоғамдық немесе әлеуметтік маңызы бар іс-шараларда, кадр оның қызметтік міндетіне қатысты болған жағдайда, өзі ашық жариялаған материалдар пайдаланылғанда немесе қоғамдық тәртіпті қамтамасыз ету мақсатында ғана жүзеге асырылады.
Әлеуметтік желілерде БАҚ пен белсенділердің парақшалары жаппай бұғатталып жатыр деген ақпаратқа тоқталған Аида Балаева министрліктің интернет платформаларға қолжетімділікті шектеумен айналыспайтынын мәлімдеді. Оның сөзінше, мұндай қауесеттер мемлекеттің беделіне нұқсан келтіруге бағытталған.
Сонымен қатар министр «Әділетті Қазақстан», «Заң және тәртіп» және «Адал азамат» қағидаттары аясында сөз бостандығының басты тірегі – жауапкершілік пен ақпараттың шынайылығын тексеру екенін атап өтті. Ол қоғамдағы танымалдық немесе жоғары мәртебе ешкімді заң талаптарын орындаудан босатпайтынын жеткізді.
Сөз соңында министр әлеуметтік желі платформаларын қоғамдық пікірталас пен сөз бостандығына кедергі келтірмей, заң талаптарына қайшы контентті жедел түрде жоюға шақырды.
