Белгілі ақтөбелік сыншы Бағдагүл әлеуметтік желідегі парақшасында Қазақстанның Ұлттық құрылтайының құрамына өнер өкілдерінің сайлануына қатысты өз пікірін ашық жариялады.
Бағдагүл әншілер Тамара Асар мен Аша Матайдың Құрылтай мүшелігіне ұсынылуына қарсы екенін айтып, олардың халық мүддесін қорғайтын алаңда қандай рөл атқаратынына күмән келтірді. Оның айтуынша, елдік мәселелерді талқылайтын маңызды жиында қоғамға нақты пайдасын тигізе алатын азаматтар болуы тиіс.
Сыншы өз жазбасында:
«Дыбысыңды шығарма, Тамара Асар! Тілімді кессең де, бас кеспек жоқ. Қайдағы Құрылтай саған? Халық үшін бір затқа тұра алмаған адамға ол жерге барудың қажеті жоқ. Ол жерге барып не істемексің? Орындықты сасытасыңдар ма екеуің? Не жетпейді саған? Өніңді сал да, қыдырсайшы! Бізге Аша Матай, Патайдың керегі жоқ! Қазақстан сендерге ойыншық емес. Оны құру үшін біздің ата-бабамыз жер жастанған. Балға жиналған ара сияқты керегі жоқ», – деп жазған.
Бағдагүлдің пікірінше, өнер адамдарының мемлекеттік және қоғамдық маңызы бар құрылымдарға енуі олардың танымалдылығымен емес, ел дамуына қосқан нақты үлесі мен азаматтық ұстанымымен бағалануы қажет.
Әлеуметтік желіде бұл мәлімдеме қызу талқыланып, желі қолданушылары екіге бөлінді. Бірі сыншының пікірін қолдаса, енді бірі өнер адамдарының қоғам өміріне белсенді араласуына қарсы еместігін білдіруде.
Ұлттық құрылтай құрамына қатысты қоғамдағы пікірталас алдағы уақытта да жалғасуы мүмкін. Өйткені мұндай мәселелерде қоғам өкілдерінің кәсіби біліктілігі мен халық алдындағы жауапкершілігі басты назарда болады.
